आमा बन्दै गरेका दुई अभिनेत्रीको खुशी

रेडियो दर्पण संवाददाता

काठमाडौं-

कसैले भनेका थिए, ‘मलाई जीवनमा धेरै कुरामा गर्व छ, तर आमा हुनु जत्तिको गर्व अरु केहीमा भएन।’

अभिनेत्रीद्वय ऋचा शर्मा र प्रियंका कार्कीले फिल्म करिअर सुरु गरेदेखि यहाँसम्म आइपुग्दा धेरै थोक कमाए। नाम कमाए, पैसा कमाए। ‘हिट’ फिल्म कमाए, प्रशंसक कमाए। तर, सायद यतिखेर जत्तिको खुशी कहिल्यै कमाएनन्।

गर्भावस्थामा उनीहरूले सामाजिक सञ्जालमार्फत् साटिरहेको खुशी, सार्वजनिक गरिरहेका ‘बेबी बम्प’ तस्बिर हेर्दा लाग्छ- उनीहरू आमा बन्न सबैभन्दा बढी आतुर छन्।

आफ्नो ‘बेबी बम्प’ तस्बिरलाई लिएर सोसियल मिडियामा भइरहेका ट्रोलप्रति प्रिंयकालाई कुनै पर्वाह छैन, उनी बेपर्वाह ‘प्रेग्नेन्सी पिरियड’लाई ‘इन्जोय’ गरिरहेकी छन्।

अघिल्लै वर्ष ऋचाले आफूलाई जन्म दिने आमा गुमाइन्। त्यही वर्ष उनी गर्भवती भइन्। कमेडी च्याम्पियनकी निर्णायक रहेकी उनले हालै मात्र कार्यक्रममै निकै घतलाग्दो र अर्थपूर्ण वाक्य बोलिन्, ‘मैले अघिल्लो वर्ष आमा गुमाएँ। यो वर्ष आमा बन्ने भएँ। म खुशी छु।’ आमा गुमाएको घाउ आमा बन्नुले नै कतै निको पार्ला भन्ने उनको आशय थियो।

युट्युबमा प्रियंका–ऋचाको ‘प्रिग्नेन्सी टक’ हेर्दा लाग्छ, आफ्नो फिल्म रिलिज हुनुअघि पनि उनीहरू त्यति उत्साहित हुन्थेनन्, जति आज ‘बेबी’ रिलिज हुनुअघि छन्।

अभिनेत्री प्रियंका कार्कीले युट्युबमा चलाउने कुकिङ सिरिज हो- ‘चप चप डायरिज’। यो सिरिजको दोस्रो सिजनमा अतिथि बनेर पुगेकी छिन्, अभिनेत्री ऋचा शर्मा।

प्रियंका र ऋचा, दुवै एकै समयमा गर्भवती भएका हुन्। प्रियंकाले बताएअनुसार उनी ऋचाभन्दा मात्रै एक हप्ताअगाडि गर्भवती भएकी हुन्।

शोको सेकेन्ड सिजनको पहिलो एपिसोडमा दुवैले गर्भावस्थाका सुःख–दुःख, खुशी–उत्साह साटेका छन्। सुरुमै प्रियंका जब ऋचालाई सोध्छिन्, ‘हाउ आर यू?’, त्यसपछि आउने जवाफले देखाउँछ उनीहरुको आमा मोह, ‘आइ एम फाइन, मम्मी’।

त्यसपछि दुवै एकअर्काको ‘बेबी बम्प’लाई प्रेमपूर्वक छुन्छन्, र खुशी हुँदै हाँस्छन्। प्रियंका भन्छिन्, ‘हामी एकै महिना आमा बन्दैछौँ। म एकदमै उत्साहित छु।’

प्रियंका–ऋचा दुवैको गर्भावस्थाको पहिलो त्रैमासिक समय गुज्रिसकेको छ। यो समयको अनुभूति साट्दै ऋचा भन्छिन्, ‘सुरुमा त निकै तर्साएको थियो। गाह्रो हुन्छ होला भन्ने लागेको थियो। तर, त्यस्तो केही भएन।’