लुम्बिनी राष्ट्रिय सभा उपनिर्वाचन : एमाले र कांग्रेस उम्मेद्वारबीच कडा प्रतिस्पर्धा, यस्तो छ अंकगणित ?

रेडियो दर्पण संवाददाता

काठमाडौं, १७ जेठ ।

रिक्त एक राष्ट्रिय सभा सदस्यको लागि आज लुम्बिनी प्रदेशमा उपनिर्वाचन हुँदैछ। सो निर्वाचनको लागि सबै तयारी पूरा भएको निर्वाचन आयोगले जनाएको छ ।

बिहान ९ बजेदेखि अपरान्ह ३ बजेसम्म हुने मतदानको कार्यक्रम दाङको घोराहीस्थित कर्मचारी मिलन केन्द्र परिसरमा हुने जिल्ला निर्वाचन कार्यलय दाङले जनाएको छ ।

मततादाको लागि ‘क’, ‘ख’ र ‘ग’ मतदान केन्द्र निर्धारण गरिएको छ । तीमध्ये ‘ग’ कोरोना संक्रमित रहेका जनप्रतिनिधिका लागि मतदान गर्ने केन्द्र रहेको आयोगले जनाएको छ ।

चुनावी मैदानमा नेकपा एमालेबाट चन्द्रबहादुर खड्का र विपक्षी गठबन्धनबाट नेपाली कांग्रेसका दृगनारायण पाण्डे प्रतिस्पर्धामा उत्रिएका छन् । निर्वाचनमा लुम्बिनी प्रदेश सभा सदस्य, स्थानीय तहका प्रमुख तथा उपप्रमुख मतदाता रहने छन् ।

०७४ सालको चुनावमा खड्का नेकपा माओवादी केन्द्रबाट राष्ट्रियसभा सदस्यमा निर्वाचित भएका थिए । फागुन २३ गते सर्वोच्च अदालतले नेकपालाई मान्यता नदिएपछि उनी एमाले प्रवेश गरेपछि माओवादीले उनलाई कारवाही गरेको थियो । आफ्नै स्थानमा उनी फेरी प्रतिस्पर्धामा उत्रिएका छन् ।

यसैगरी विपक्षी गठबन्धनका उम्मेदवर पाण्डे ०७४ सालको चुनावमा नेकपा एमालेको तर्फबाट लुम्बिनी प्रदेश सभा सदस्यमा निर्वाचित भएका थिए । गत महिना उनी एमाले त्याग गरी कांग्रेसमा प्रवेश गरेका थिए । पाण्डेलाई विपक्षी गठबन्धनका कांग्रेस, माओवादी केन्द्र, जसपा उपेन्द्र यादव, एमाले माधव समूह र राजमोको साथ रहेको छ । यस्तै, खड्कालाई एमाले ओली समूह र जसपा महन्थ समूहको साथ रहेको छ ।

यस्तो छ लुम्बिनी प्रदेशको मतभारको अवस्था :

लुम्बिनीमा निर्वाचन आयोगले यसअघि सदस्यबाट निस्कासित भएका जसपाका चार जना सदस्यलाई मतदानको अधिकार दिएपछि प्रदेशमा ८३ प्रदेश सभा सदस्य छन्। एक जना सदस्यको मतभार ४८ रहने व्यवस्था अनुसार ८३ जनाको जम्मा मतभार ३९८४ हुन आउँछ ।

यसैगरी निर्वाचन आयोगका नामावली अनुसार स्थानीय तहका मेयर, उपमेयर, अध्यक्ष्न र उपाध्यक्ष गरी २१७ जना मतदाता रहेका छन् । एकजनाको मतभार १८ रहने व्यवस्था अनुसार स्थानीय तहको जम्मा मतभार ३९०६ रहनेछ । दुवै मतभार जोड्दा लुम्बिनी प्रदेशमा जम्मा ७ हजार ८ सय ९० रहनेछ ।

यसअघि वागमती प्रदेशमा भएको राष्ट्रिय सभा उपनिर्वाचनमा सत्ताधारी दल एमालेको उम्मेद्वार निर्वतमान गृहमन्त्री रामबाहादुर थापालाई स्वतन्त्र उम्मेद्वार डा. खेमलाल देवकोटाले पराजित गरहेकोले आजको निर्वाचन पनि सवैले चासोका साथ हेरेका छन् । नेकपा एमालेका वरिष्ठ नेता माधव नेपाल सहित दर्जन नेताहरुलाई पार्टीबाट निष्कासन गरेको र माधव समूहको समर्थन पाण्डेलाई रहेकोले खड्का पुनः निर्वाचित हुन सक्नने सम्भावना न्यून रहेको छ ।

निर्वाचन आयोगका अनुसार मतदान सकिएलगत्तै मतगणनाको व्यवस्थापन मिलाइएको छ र आजै अन्तिम मतपरिणाम आउने सम्भावना छ।