समाजवादीका केन्द्रीय सल्लाहकार एमालेमै फर्किए

रेडियो दर्पण संवाददाता

काठमाडौं ९ कात्तिक ।

नेकपा एकीकृत समाजवादीका केन्द्रीय सल्लाहकार सदस्य रहेका नन्दीकेशर ढकाल एमालेमै फर्किएका छन् । मंगलबार एमाले बुटवल उपमहानगर कमिटीको प्रथम अधिवेशनमा सहभागी हुँदै उनले समाजवादी छाडेका हुन् । उनलाई एमालेमा पार्टीका उपमहासचिव विष्णु पौडेलले स्वागत गरेका थिए ।

अधिवेशनअघि ढकालले उपमहासचिव पौडेलसँग छलफल गरेका थिए । छलफलपछि उनी मूल पार्टीमै फर्किएर अधिवेशनमा सहभागिता जनाएका हुन् । ढकाल रुपन्देहीमा एमालेका पुराना नेताको रूपमा चिनिन्छन् ।

रूपन्देहीमा दुई दिनमा तीन लाखको पटाका बरामद

जिल्ला प्रहरी कार्यालय रूपन्देहीले जिल्लाका विभिन्न ठाउँबाट विस्फोटक पदार्थ पटाका बरामद गरेको छ ।

भारतबाट नेपाल भित्र्याइएको अवस्थामा कार्यालयबाट खटिएको टोलीले फरक फरक स्थानबाट विभिन्न प्रकारका पटाका बरामद गरेको हो ।

बरामद भएको पटाका अन्दाजी तीन लाख रुपैयाँ बराबरको रहेको र खाल्डोमा पुरेर नष्ट गरिएको जिल्ला प्रहरी कार्यालयका प्रवक्ता प्रहरी नायव उपरीक्षक सत्यनारयण थापाले जानकारी दिए ।

कार्यालयबाट खटिएको प्रहरी टोलीले सीमा क्षेत्र सिद्धार्थनगर- १ बाट अन्दाजी ९० हजार र प्रहरी चौकी मेउडिहवा रूपन्देहीबाट खटिएको प्रहरी टोलीले ६५ हजार रुपैयाँभन्दा बढीका विभिन्न किसिमका २६२ प्याकेट, प्रहरी चौकी मर्यादपुरले कोटहीमाई ऐलिडियाबाट ५० हजार रुपैयाँभन्दा बढीको साइकलसहित दुई बोरा पटाका बरामद गरी नष्ट गरेको जनाइएको छ ।

प्रहरी चौकी मैनिहवाले रोहिणी- २ भगवानपुर चोकबाट ३६ हजार रुपैयाँभन्दा बढीको २०० प्याकेट, इलाका प्रहरी कार्यालय लुम्बिनी र प्रहरी चौकी कालीदहले ३५ हजार रुपैयाँभन्दा बढीको ५०० प्याकेट र इलाका प्रहरी कार्यालय मंगलापुरले तिलोत्तमा- १५ पत्थरडाँडाबाट ३२ हजार रुपैयाँ बराबरको १२२ प्याकेट अवैध पटाका बरामद गरी नष्ट गरेको जिल्ला प्रहरी कार्यालयले जानकारी दिएको छ ।

तिहार नजिकिँदै गर्दा सीमापारिबाट व्यावसायिक र व्यक्तिगत प्रयोगका लागि पटाका भित्रिने क्रम बढेको छ । प्रहरीले यसअघि पनि १० लाख रुपैयाँभन्दा बढीको पटाका बरामद गरी नष्ट गरेको छ ।